Asinan en Tordoia un plan de banda longa no rural galego

Redacción-Tordoia

Sinatura do acordo entre Medio Rural e a Axencia de Modernización Tecnolóxica

O Concello de Tordoia foi o lugar escollido pola Xunta para asinar un convenio entre a Consellería de Medio Rural e a Axencia para a Modernización Tecnolóxica de Galicia encamiñado a ofrecerlles acceso a internet de banda longa ao 6% da poboación de toda Galicia ao que aínda non chega esta prestación.
O plan estenderase ata 2014 e suporá un investimento, en toda Galicia, de 2,4 millóns de euros achegados pola Axencia Galega de Desenvolvemento Rural (Agader). A conselleira Rosa Quintana afirmou que permitirá equiparar a calidade de vida do rural coas zonas urbanas.
Unha das accións do plan será a conexión de internet vía satélite, cunha liña de axudas que se convocará proximamente para que as pequenas empresas do rural implanten as novas tecnoloxías no seu negocio. Tamén as poderán solicitar particulares e entidades sin ánimo de lucro, en lugares onde non están dispoñibles accesos mínimos de dous megas. A axuda, que se tramitará mediante empresas suministradoras do servizo, sufragará o equipo vía satélite e a súa instalación.
O alcalde tordoiés, Antonio Pereiro, destacou que o seu municipio será un dos beneficiados e que nos últimos anos pasou dunha cobertura de banda longa do 19% ao 55% da poboación. Anticipou tamén que está previsto que antes do verán o despregamento de novas redes 3G leve o servizo ata un 70% dos veciños. O plan en desenvolvemento aspira a chegar ao 96% cando se remate.