O goberno ultima a cesión de terreos
á Xunta para un albergue de peregrinos
Redacción-Oroso
 |
| A rúa Camiño
Real estrea pavimento e mobiliario e conta con arborado |
O concello prevé poñer “en
breve” a disposición da Xunta o terreo para construír
un albergue de peregrinos en Sigüeiro. Así o anunciou
o alcalde, Manuel Mirás, durante a visita ao concello do
conselleiro de Innovación de Industria, Fernando Blanco,
que acudiu acompañado dos xerentes do Xacobeo e de Galicia
Calidade.
O rexedor expuxo que “os concellos estamos moi mal de fondos
para comprar terreos e estamos intentando conseguilos cos propietarios
mediante o método de compensación”. O conselleiro
ofreceu o seu apoio para o albergue, o único que habería
no Camiño Inglés desde Bruma (Mesía) ata Santiago.
“Aposta” polo Camiño
A visita do titular de Innovación e Industria serviu para
inaugurar a rehabilitación da rúa Camiño Real
de Sigüeiro, executada nos últimos meses con 301.000
euros, a gran maioría achegados pola consellería.
O alcalde sinalou que a obra é “mostra da aposta de
Oroso polo Camiño Inglés”, do que destacou o
elevado número de peregrinos aínda sen ser tan coñecido
como o Francés. O tenente de alcalde, Xosé Manuel
Pérez, indicou que “imos apostar pola recuperación
na súa totalidade do Camiño Inglés” e
agarda o apoio da Xunta.
Aparcamento no polígono
Por outra parte, o conselleiro confirmou o investimento de 185.000
euros para dotar de aparcamentos o polígono industrial, dentro
dos 2,6 millóns que o seu departamento inviste en Oroso de
2007 a 2009, a maioría en mellora eléctrica.
|
