|
|
Regos: «O noso esforzo durante os vindeiros
anos irá dirixido a combater a crise a través dunha
boa xestión»
Redacción-Ordes
 |
| A prioridade para
Regos é manter os servizos sociais |
Consciente de que serán anos difíciles,
Manuel Regos, alcalde de Ordes, aposta nesta nova lexislatura por
sacar ao municipio desta situación, que esixe, unha xestión
exemplar dos recursos municipais. A priorización dos servizos
máis necesarios para as familias do municipio, o fomento do
emprego, o desenvolvemento de Ordes co futuro Plan Xeral e recortes
incómodos aínda que necesarios, serán a base
do seu traballo de cara aos vindeiros anos.
- Corren tempos difíciles, ¿que esixe para
os políticos esta situación?
- O panorama actual é complicado e nos vindeiros anos o que
se esixirá aos políticos será unha xestión
exemplar. Os mellores xestores serán os que poidan sair desta
situación e estou seguro de que seremos un deses concellos
que superarán este momento. O noso esforzo irá dirixido
a combater a crise a través dunha boa xestión.
- ¿Que medidas se están a tomar en Ordes
para combater a crise?
- A priorización de servizos e a optimización dos recursos
públicos están a ser xa unha constante na nosa xestión.
Moi ao meu pesar haberá que realizar recortes e incluso cobrar
por algúns servizos que non son básicos nin de primeira
necesidade para os veciños e veciñas, porque é
o que esixe o momento. Sei que os cidadáns son conscientes
da situación e espero que poidan entendelo.
A administración local, que é a máis cercana
aos veciños, debe ofrecerlles todo o seu apoio, aínda
que, en realidade, se trata da administración pública
con menos recursos.
- ¿Cales serán as prioridades?
- Sen dúbida o mantemento dos servizos sociais, o fomento do
emprego e a atención ás familias, co fin de paliar na
medida do posible as consecuencias que lles está a causar esta
crise. Seguiremos traballando pola atención aos nenos e aos
máis maiores, a conciliación e en definitiva garantir
os servizos básicos a todos os veciños e veciñas
de Ordes.
- ¿Cre que se poderá facer fronte á
débeda do Concello?
- Coas medidas que se tomarán e as que xa se levan tomado espero
que en dous ou tres anos esta situación estea superada.
- En días pasados a Xunta anunciou, e tamén
a Deputación, que favorecerán aos concellos que mancomunen
servizos, ¿que opina sobre este tema?
- Dado o momento que estamos a vivir paréceme ben que os concellos
mancomunen servizos porque isto propiciará que lles saian máis
rentables e non é unha mala opción. Na Mancomunidade
de Ordes xa temos algúns servizos compartidos e non están
tendo un mal resultado.
- O PXOM está cada vez máis preto de ser
unha realidade, ¿que suporá este documento para Ordes?
- O Plan Xeral de Ordes será sen dúbida un instrumento
que marcará o desenvolvemento do municipio. Con el apostamos
por potenciar o crecemento ordeado de Ordes tendo en conta novas e
importantes infraestruturas, así como facilitando tamén
a creación e instalación de novas empresas no municipio
que sirvan para crear emprego para a nosa mocidade.
Foi un traballo moi longo que deu comenzo a principios da pasada lexislatura
e que tivo moitos atrancos debido á aparición de nova
lexislación que provocou que houbera que adaptar o que se levaba
feito, pero agora está todo encamiñado para que sexa
unha realidade.
- Todo indica que Ordes será un concello de futuro.
- Dende logo por isto é polo que levamos traballando durante
moito tempo e pouco a pouco estamos conseguíndoo. Como dixen
antes, corren tempos difíciles, pero poñeremos todo
da nosa parte para que o noso municipio siga no camiño do desenvolvemento
como xa ten demostrado.
- Co fin de que o medio rural conte cos mesmos servizos
que a zona urbana o Concello fíxose eco tamén dalgunha
demanda como o acceso á banda ancha de internet.
- Conscientes da demanda que había nas parroquias o Concello
estableceu un protocolo de colaboración coa empresa Allticnor
SLNE, na que participan as empresas locais IDE informática
e PM Sat, para facer chegar este servizo aos veciños. Estas
empresas son as responsables da dotación dos equipos informáticos
e as antenas que permitirán aos veciños do rural a onde
non chega o ADSL, acceder á banda ancha e ter ademais gratis
a instalación e adquisición dos dispositivos necesarios.
En Ordes non hai veciños de primeira e de segunda e queremos
que no medio rural se goce dos mesmos servizos que no centro da vila.
- Chegados ao Nadal, ¿que lle diría aos
seus veciños e veciñas?
- Con ilusión, esforzo e traballo afrontaremos o 2012, felices
festas a todos. |
|
|
|
|
