Desde a esq., Jesús Pedreira, Manuel Regos e Roberto García

O goberno ordense estuda aplicar reducións nas taxas de concesión de licenza de actividade para as explotacións agrogandeiras. Seguindo unha proposta do sindicato Unións Agrarias (UUAA), as bonificacións serían do 80%, e incluso de ata un 95% no caso de explotacións consideradas prioritarias.
Con todo, a proposta definitiva prantexarase no pleno ordinario de finais de setembro. De momento, os servizos xurídicos municipais estudan a súa viabilidade e a súa repercusión.
Non son industrias
Na actualidade, a ordenanza do concello que regula a concesión de licenzas de actividade fixa unha base impoñible da taxa de 3,15 euros por metro cadrado, cun incremento do 50% para actividades catalogadas como molestas, insalubres e perigosas.
O secretario xeral de UUAA, Roberto García, explicou que os gandeiros “cada cinco ou seis anos teñen que facer investimentos nas instalacións, o que leva á necesidade de solicitar licenza de actividade que, ao estar ligada a un número de metros cadrados moi elevado, a aplicación da ordenanza leva aos agricultores e gandeiros a ter que pagar cantidades cuantiosas”.
Neste sentido, o alcalde, Manuel Regos, asegura que “un agricultor non é o mesmo que unha grande industria para afrontar ese desembolso de cartos”. O goberno local ve nesta medida unha forma de “axudarlle no posible” a un sector que atravesa unha crise constante, pola baixada de prezos en orixe e o incremento de custos de produción.
Regos destacou tamén que o concello quere apoiar ás explotacións “dotándoas dos servizos necesarios para que continúen coa súa actitividade”, a través da área municipal de Medio Rural que dirixe Jesús Pedreira.
Ordes é o primeiro concello onde UUAA presentou esta iniciativa, que en vindeiras datas levará a outras comarcas de Galicia.