Encontro entre o ministro de Industria e o conselleiro de Traballo

Os proxectos do centro de desenvolvemento tecnolóxico no polígono do Acevedo, a liña eléctrica de media tensión soterrada entre Meirama e O Acevedo e a terceira fase de ampliación do parque industrial foron aprobados en pleno sen votos en contra. Todos eles están financiados no plan Miner.
En concreto, o centro tecnolóxico custará uns 2,4 millóns de euros, ubicarase a carón do Xardín Botánico e prevese que sexa unha realidade en 2010. Deberá prestar servizo en novas tecnoloxías ás empresas do entorno.
A ampliación do parque industrial valórase en catro millóns de euros. Por certo, a mesma sesión aprobou a adaptación da primeira fase e a primeira ampliación do polígono á lei do solo.
En canto á liña de media tensión, sairá a contratación por 1,4 millóns de euros. A preguntas do BNG, o alcalde confirmou que xa está asinado o convenio entre concello, Fenosa e Udesa e anunciou que as obras incluirán unha canalización para incluír nun futuro a fibra óptica, unha vez chegue desde a AP-9 ata a central térmica.
Confirmación do Miner
Por outra banda, o ministerio de Industria confirmou o investimento dos 92 millóns de euros que lle corresponden a Galicia, sobre todo ás Pontes e a Cerceda, no plan Miner para os próximos anos. Foi nun encontro entre o ministro Miguel Sebastián e o conselleiro de Traballo, Ricardo Varela. Estiman que as iniciativas do Miner crearán xa en 2009 uns 560 empregos directos en Galicia.