O pleno municipal aprobou por unanimidade o convenio de colaboración e o anexo técnico para o desenvolvemento do transporte metropolitano na comarca de Compostela. Un convenio que permitirá que “todos os veciños de Brión pagarán 0,72 céntimos polo billete, o prezo será igual para todos independentemente do lugar onde vivan”, explicou o alcalde brionés, Xosé Luis García.
“Isto vai supoñer un importante aforro para os veciños de Brión, especialmente para os que residen nas parroquias da parte alta do municipio”, sinala Xosé Luis García, “xa que, por exemplo, un billete dende Cornanda custa agora 3,05 euros e con este acordo pasarán a pagar 0,72 euros como veñen facendo, por exemplo, os veciños dos Ánxeles”. Un aforro ao que haberá que sumar tamén a posibilidade de poder coller un autobús urbano e as distintas tarifas especiais para grupos como terceira idade ou estudantes.
Este convenio suporá tamén que Brión incrementará catro frecuencias de autobuses na liña que une Chave da Ponte (Bastavales) con Os Ánxeles e Santiago. Ademais, Xosé Luis García destaca que “Brión e Teo son os únicos municipios que poden incluír no convenio liñas de interese municipal, que percorren o interior dos nosos municipios”. Finalmente, o alcalde brionés amosouse satisfeito por este convenio pois “é un tema que vén de hai moitísimo tempo e por fin houbo unha proposta concreta de convenio, que queda tal e como estaba no anterior Goberno da Xunta”.