Alcalde de Ames, conselleiro e alcalde de Brión

O consellerio de Medio Ambiente, Territorio e Infraestruturas, Agustín Hernández, visitou as obras para o abastecemento de auga potable dos municipios de Ames e de Brión, acompañado polos alcaldes destes dous municipios, Santiago Amor e Xosé Luis García.
Os traballos, iniciados xa hai varios meses, teñen executada a metade das canalizacións. A consellería indica que o seguinte paso vai ser a estación potabilizadora (ETAP) e os depósitos, en canto o Concello de Ames poña terreos á súa disposición. Sobre esto, Santiago Amor anunciou que están tramitando as expropiacións e acusou ao seu antecesor, Carlos Fernández, de non dar resolto esta cuestión e de obrigar a que a obra tivese que empezar polas conducións.
O proxecto, que paga nun 80% a Xunta e nun 10% cada Concello, culminará unha infraestrutura hidráulica con capacidade para unhas 95.000 persoas.
O ex alcalde e voceiro do PSOE, Carlos Fernández, considera un “lamentable paripé” a visita do conselleiro e indica que as obras da potabilizadora xa se iniciaron no seu mandato. Acusa ao PP de montar unha “pantomima partidista” para “posicionar” nos medios ao “inexperto” Amor, e sinala que incluso se obrigou a estar, en sábado, aos obreiros da empresa á que se lle contrataron as obras.