Os grupos da oposición marcharon da sesión plenaria de febreiro

O novo colexio de infantil e de primaria do Milladoiro está un pouco máis cerca. Días atrás, o alcalde, Carlos Fernández, recibiu un escrito do secretario xeral da consellería de Educación, José Luis Vázquez, co “compromiso” de construír o centro, din desde o concello.
A Xunta pide propostas de posibles emprazamentos nunha parcela mínima de 12.150 metros cadrados. Tras seren aceptados, viría a sinatura dun convenio entre as dúas administracións.
O alcalde fixo o anuncio dunha infraestrutura tan esperada no pleno de febreiro, marcado tamén pola controversia no ofrecemento á Xunta dun terreo en Bertamiráns para unha escola infantil e doutro no Milladoiro para un centro de día.
A posta a disposición destes terreos aprobouse coa maioría simple do goberno e a abstención da oposición. A polémica deuse porque PP e BNG pensaban que era precisa maioría absoluta. E é que na comisión informativa previa ao pleno o asunto abordárase como cesión gratuíta, que si require máis apoios.
Por eso, os dous grupos da oposición abandonaron a sesión e acusan ao rexedor de “manipular a orde do día” para aprobar “unha chapuza urbanística”. O rexedor replica que PP e BNG montan un “circo” porque “non resisten que un goberno en minoría sexa capaz de sacar adiante os seus proxectos”.
O pleno tamén tomou coñecemento da renuncia de Santos Lorenzo como edil.