Os proxenitores dos case cincuenta cativos de 3 e 6 anos que quedaron sen praza escolar no colexio Agro do Muíño (Bertamiráns, Ames) para o vindeiro curso emitiron un contundente comunicado no que aseguran sentirse vítimas dos “enganos, mentiras, desidia, insolidariedade e incomprensión” do Concello e, sobre todo, da Consellería de Educación.
Despois de varios meses dando a batalla para evitar ter que enviar aos seus fillos a colexios como o de Barouta (a dez quilómetros, e non a carón das súas casas), nos que reuniron máis de 4.200 sinaturas de apoio, chegan a cuestionarse “se realmente aparentamos tan parvos como se nos fai ver!”.
Á Consellería critícanlle que despreze o problema, logo de que por exemplo a xefa territorial de Educación lles dixese que levar os nenos a centros distantes “non era para tanto”.
Os afectados din que a Xunta se precipitou ao desbotar a instalación temporal de módulos prefabricados en Agro do Muíño, proposta do anterior goberno local de Carlos Fernández, cun informe técnico que poñen en dúbida por elaborarse medindo só o patio e non o terreo contiguo que ofrecía o Concello.
Busca dunha parcela
E ao actual goberno local de Santiago Amor aféanlle que non lles presentase a súa alternativa concreta á vez que lles dicía que “lles ía gustar”, din. Neste sentido, o Concello afirma que non fixo pública a súa proposta, rexeitada polos técnicos de Educación, para non xerar falsas expectativas. Reitera que está a disposición dos afectados “en todo momento” e suliña que é unha “situación herdada” dos mandatos anteriores que tratan de solucionar buscando parcela para un novo colexio.