O parque comarcal de bombeiros construirase na parcela prevista nun principio para o instituto de secundaria e bacharelato do Milladoiro, no S-16 Galdrachán. O centro educativo pasará a unha parcela do mesmo sector, de 11.800 metros cadrados. Cumpre así as condicións da consellería de Educación, á que os 4.700 metros cadrados da parcela inicial se lle facían insuficientes.
O acordo de cesión das parcelas tivo o apoio do PP, que o ve como mal menor. O BNG deu a negativa no caso dos bombeiros e abstívose na nova parcela do IES.
Os nacionalistas xustificaron a súa discrepancia en que o emprazamento decidido para os bombeiros “liquida” o proxecto do gran parque recreativo no centro do Milladoiro, plasmado nos orzamentos deste ano con 1,9 millóns de euros. Tamén cren que a parcela non ten as comunicacións idóneas para os bombeiros. O Bloque dixo barallar sete ubicacións alternativas en Ames.
O alcalde, Carlos Fernández, acusounos de dicir “medias verdades”. Negou que as cesións aprobadas afecten ao parque central porque as dúas parcelas son para equipamentos, non zona verde, como determinara un pleno anterior por unanimidade. E sobre os accesos, aseverou que a construcción do parque poderá servirlle de “baza” para conseguir melloras nas vías de comunicación.