Alumnos afectados, familiares e concelleiros na rolda de prensa

O pasado 21 de novembro oito alumnos do IES de Viós eran informados pola dirección do centro de que tiñan que renunciar a parte das materias nas que están matriculados para este curso, ou ben cambiar a súa matrícula para algún dos centros de ensino de Betanzos. A causa destes feitos, que a Consellería de Educación ten previsto suprimir as asignaturas de latín, bioxeoloxía e francés que se impartían no centro, segundo os afectados, porque non se reuniu o número mínimo esixido pola lei de cinco alumnos por materia.
Indignados ante esta situación alumnos e familiares desprazábanse o pasado 24 de novembro á delegación da Consellería de Educación na Coruña, onde finalmente, non foron recibidos. Por iso realizaban ante os medios de comunicación unha rolda de prensa no Concello de Abegondo, apoiados polo alcalde e concelleiros do grupo de goberno. Unha das nais dun alumno afectado, Araceli Sanjuán, foi moi clara na súa exposición e manifestou que os alumnos “teñen un contrato coa Administración, que é a matrícula, e a Administración non pode dicir que os alumnos elexiron mal ou elexiron o que non lle convén á Administración”. Teñen claro que se trata dun problema que en Abegondo creou a Consellería e é ela quen o ten que solucionar. Ademais engadiron que a supresión de determinadas asignaturas suporá a imposibilidade de cursar ramas específicas de bacharelato.
Os pais e nais dos alumnos afectados anunciaron que non aceptarán nin o cambio de centro nin de materias.