A plataforma de veciños afectados
apraza novas protestas contra Adif ata finais de abril
Redacción-Curtis
 |
| Concentración de protesta á
altura do antiguo paso de Curtis a Bodeus |
Tres semanas duraron, polo de agora, os actos
de protesta da plataforma de afectados polo Administrador de Infraestructuras
Ferroviarias (Adif) constituida a finais de xaneiro. Despois de varias
concentracións, lecturas dun manifesto, recollida de sinaturas
ou colocación de carteis a carón da vía férrea,
decidiron abrir unha “tregua” ata finais de abril.
Aseguran que así pretenden amosarlle ao ente xestor das vías
ferroviarias e, por extensión, ao ministerio de Fomento, que
a súa vontade é a de atopar unha “solución
construtiva”. “Agora tócalles a eles falar”,
indican.
O que agardan dos responsables da liña ferroviaria é
que habiliten pasos alternativos aos pasos a nivel pechados hai máis
de medio ano “con nouturnidade e alevosía”, segundo
comentan na plataforma.
As súas reivindicacións téñenas repetido
ata a saciedade durante todo este tempo: un paso soterrado na Pena
(Fisteus) para o que os propietarios xa cederan terreos de balde,
outro en Paio Rodríguez (Lourdes), unha pasarela peonil entre
Bodeus e o núcleo de Curtis, a pavimentación adecuada
das vías de servizo anexas, e un camiño de servizo para
unha finca que quedou sen acceso ao construír o paso elevado
nas Rabuñas.
A plataforma, que reuniu varias deceas de veciños nas súas
concentracións, indica que Adif se comprometera no seu día
a acometer estas actuacións e non descarta reclamalas máis
adiante pola “vía legal”.
Apoio político
As peticións veciñais recibiron o apoio de todos os
grupos políticos do concello, que aprobaron por unanimidade
unha moción do goberno que recollía e respaldaba as
súas demandas, conducentes a evitar os rodeos que a cotío
se ven obrigados a dar.
A plataforma tamén recibiu a visita dos parlamentarios do
PP Carlos Negreira e Belén do Campo. Emprazaron a Fomento
a cumprir a súa palabra para facilitar a vida diaria dos
veciños e evitar a falta de seguridade que, segundo o PP,
orixina a situación creada. |
