A Deputación mellorará tres estradas de Cesuras e de Curtis

Redacción- Betanzos

A Deputación da Coruña adxudicou xa as obras de mellora da seguridade viaria de tres estradas nos municipios de Cesuras e de Curtis. Actuacións nas que en conxunto inviste 388.280 euros.
En Cesuras, o goberno provincial destina case 104.000 euros para unha senda peonil na estrada DP 2601. O proxecto permite ampliar a calzada que vai desde a casa consistorial ata a estrada DP 0104, a chamada estrada do Paraxón. A senda para viandantes sitúase na marxe esquerda. Ademais de repoñer unha drenaxe transversal, os traballos inclúen un balizamento nas curvas para separar a senda peonil da estrada.

Obras en Curtis
En Curtis, a Deputación gastará uns 217.000 euros na renovación das beirarrúas e a iluminación da rúa Emilio Martínez Sánchez do núcleo de Curtis, que forma parte da DP 3201. Ademais de renovar a beirarrúa actual, construirase unha nova nun treito de 65 metros onde ata agora non había. Coa nova iluminación, instálase unha nova rede eléctrica. Tamén se renovan os sumidoiros e repóñense os servizos afectados.
A outra actuación que levará a cabo a Deputación en Curtis é unha senda peonil de 700 metros na estrada DP 3204 (Curtis-Lavacolla). Custará 67.000 euros, terá unha anchura mínima de 2,10 metros e estará totalmente balizada, tal e como explican dende o ente provicincial.