Denuncia contra o alcalde de Aranga e un
promotor por suposto delicto urbanístico
Redacción-Aranga
A fiscalía do Tribunal Superior de
Xustiza de Galicia (TSXG) denunciou ao alcalde de Aranga, Manuel
Brañas, e a dous responsables da empresa “Promotora
de Viviendas Urbanas”, propiedade de José Collazo,
por supostos delictos relacionados coa recalificación de
terreos para construír un polígono industrial e centos
de vivendas.
O fiscal apela a artigos do Código Penal relativos á
violación de segredos, infidelidade na custodia de documentos,
uso de información privilexiada achegada por funcionario
público ou autoridade, e alteración de prezos no libre
mercado.
A denuncia, presentada no Xulgado de Betanzos tras meses de investigacións,
indica que rexedor e promotora asinaron dous convenios que calificaban
terreo do Monte Santiso como solo industrial e urbano, pese a que
a Xunta lle comunicara ao concello en outubro de 2005 que debía
mantelo como rústico. As parcelas sufriran incendios no verán
e nese caso a lei prohíbe recalificar.
Engade a fiscalía que, ata que se coñeceron os convenios
en xaneiro pasado, a empresa, mediante outra sociedade, mercou terreos
“a un prezo muy inferior” ao resultante da recalificación.
Este é un dos motivos da indignación veciñal
recente.
A fiscalía descoñece se na sinatura dos convenios
mediou ou non “algún tipo de ventaja o retribución”.
Matiza que a investigación, que pide que remate o xulgado,
non prexulga o resultado final das dilixencias, polo que evidentemente
se mantén a presunción de inocencia que ampara a todo
cidadán.
O PP DI SER O PRIMEIRO INTERESADO EN QUE SE ACLARE TODO
No PP de Aranga din ter “plena confianza” na xustiza
e que son “los primeros interesados en que se aclare la situación
porque el alcalde es el más perjudicado”.
Ademais, indica que “no son los fiscales los que determinan
la culpabilidad de nadie, sino que esta función corresponde
exclusivamente a los jueces”. O PP afirma que a miúdo
as denuncias de fiscais son arquivadas. E agarda que o proceso poña
“luz y taquígrafos” nun asunto no que acusan
a PSOE e BNG de buscar “rentabilidad política”.
|
